مێژووی گشتی حیزبی دێموکراتی کوردستان (سەردەمی زێڕینی نەتەوایەتی) – بەرگی دووهەم
خوێنەری بەڕێز، ئێستا چوار بەرگی کتێبی مێژووی گشتیی حیزبی دێموکراتی کوردستان، لەبەر دەستتان دایە. لە نووسینی ئەم کتێبە دا، بە ئەمانەتەوە هەوڵ دراوە لە هەرچی بەڵگە، دیکۆمێنت، نووسراوە و قسەی زارەکی کە بەردەست کەوت بێ، کەڵک وەرگیرێ. بابەتەکانی ئەم کتێبە بەربڵاو و هەمە لایەنەیە و نەتەنیا سیاسەت و کار و تێکۆشانی ئەندامانی حیزب لە خۆ دەگرێ، بەڵکوو هەڵسوکەوتی ڕێژیمەکانی زاڵ بەسەر کوردستان و ڕێکخرا و گروپەکانی ئۆپۆزیسیۆنی سەرانسەری و کوردستانی لە پەیوەندی لەگەڵ حیزبی دێموکرات دا دێنێتە بەر باس. دوو بەرگی یەکەم و دووهەمی ئەو کتێبە لە پێش دامەزراندنی حیزبی دێموکرات دەست پێدەکا و تا ڕووخانی کۆماری کوردستان لە خۆ دەگرێ. بەرگی سێهەم، ئەدەبی و فەرهەنگی‌یە و گشت ئەو شێعرانە لە خۆ دەگرێ کە لەسەردەمی کۆمەڵەی ژ.ک و کۆماری کوردستان دا بڵاو کراونەتەوە. بەرگی چوارەم لە دوای ڕووخانی کۆماری کوردستان ڕا دەست پێدەکا و ساڵانی سی و چلەکان تا ڕاپەڕینی گەلانی ئێران لە ساڵی ١٣٥٧ دەخاتە بەر باس. بێشک خوێندنەوەی ئەو کتێبە کات دەگرێ، بەڵام دەتوانێ بۆ ڕوون بونەوەی زۆر بابەتی شاراوەی مێژوویی حیزبی دێموکرات یارمەتی بە خۆێنەر بکا .
بە سپاسەوە قاسم قازی
